13 மே, 2021

கொரோனா தடுப்பு மருந்து – காப்புரிமை என்ற மரண வணிகம்

 உலகத்தின் வல்லரசு நாடுகளையே மிரட்டிவரும் கொரோனா வைரஸுக்கு எதிராக சுமார் 10 தடுப்பு மருந்துகள் புழக்கத்தில் உள்ளன. மேலும் பல தடுப்பு மருந்துகள் ஆய்வுநிலையில் உள்ளன. இந்த தடுப்பு மருந்துகள் அனைத்தும் பெரும் பொருட்செலவில், ஆபத்து மிகுந்த சூழ்நிலையில் ஆய்வு செய்யப்பட்டு கண்டுபிடிக்கப்படுகின்றன. எனவே இம்மருந்துகள் அனைத்தும் பேடன்ட் என்ற காப்புரிமையை பெறுகின்றன. இதன் விளைவாக இந்த பேடன்ட் காப்புரிமை பெற்ற நிறுவனங்களைத் தவிர மற்ற நிறுவனங்கள் இந்த தடுப்பு மருந்தை உற்பத்தி செய்ய முடியாது. எனவே இந்த தடுப்பு மருந்து பேடன்ட் காப்புரிமை பெற்ற சில மருந்து நிறுவனங்களின் கட்டுப்பாட்டில் சிக்கி விடுகிறது. இதனால் ஏழை நாடுகள் இந்த நோய்த்தடுப்பு மருந்தை பெறமுடியாமல் அந்நாடுகளில் வசிக்கும் மக்கள் கொத்துக்கொத்தாக உயிரிழக்கும் அவலம் நிகழ்கிறது.



போர்க்காலங்களிலும், பெருந்தொற்று நோய்க்காலங்களிலும் பேடன்ட் காப்புரிமையை தற்காலிகமாக ரத்து செய்ய வேண்டும் என்ற கருத்து பரவலாக விவாதிக்கப்படுகிறது. எனினும் இந்த கொரோனா பெருந்தொற்று காலத்தில் பல நாடுகளில் தடுப்பு மருந்துகள் எட்டாக்கனியாகவே உள்ளன. 

இந்நிலையில் கொரோனா நோய் தடுப்பு மருந்துகளுக்கான பன்னாட்டு மருந்து தயாரிப்பு நிறுவனங்களின் பேடன்ட் காப்புரிமையை தற்காலிகமாக ரத்து செய்ய வேண்டும் என்று இந்தியா, தென்னாப்பிரிக்கா ஆகிய நாடுகள் உலக வர்த்தகக் கழகத்திடம் கோரிக்கை விடுத்துள்ளன. இதன் மூலம் பல ஏழை நாடுகள் இந்த கொரோனா நோய்த்தடுப்பு மருந்துகளை உற்பத்தி செய்தோ, வாங்கியோ அந்த நாடுகளில் கொரோனா காரணமான உயிரிழப்புகளை தடுக்கமுடியும் என்று இந்நாடுகள் கூறுகின்றன. சுமார் 100 ஏழை மற்றும் வளர்ந்துவரும் நாடுகள் இந்த கோரிக்கைக்கு ஆதரவு தெரிவித்துள்ளன.  ஆனால் அமெரிக்கா, இங்கிலாந்து, ஐரோப்பிய யூனியன், ஸ்விட்சர்லாந்து, ஜப்பான், நார்வே, பிரேசில் உள்ளிட்ட நாடுகள், சில மருந்து நிறுவனங்கள், மைக்ரோசாப்ட் அதிபர் பில் கேட்ஸ் ஆகியோர் கொரோனா நோய்த்தடுப்பு மருந்துகளுக்கான பேடன்ட் உரிமையை ரத்து செய்யக்கூடாது என்று உரத்து குரல் எழுப்புகின்றனர். கொரோனா நோய்த்தடுப்பு மருந்தை கண்டுபிடிப்பதற்கு மேற்கொள்ளப்படும் செலவுகள் மிக அதிக அளவில் இருப்பதாலும், இது மிகவும் ஆபத்து மிகுந்த பணியாக இருப்பதாலும் அதற்கான வெகுமதி மிகவும் அவசியம் என்றும், பேடன்ட் காப்புரிமையை ரத்து செய்தால் புதிய மருந்துகளை கண்டுபிடிக்கும் பணியே நடைபெறாது என்றும் பேடன்ட் காப்புரிமை ஆதரவாளர்கள் கூறுகின்றனர். ஆனால் பேடன்ட் காப்புரிமை பெற்ற நிறுவனங்கள் கொள்ளை லாபம் ஈட்டுவதற்கும், அதன் முதலீட்டாளர்களுக்கு அதிக லாபத்தை வழங்குவதற்கும், அதன் மூலம் மிக அதிகளவில் முதலீட்டை திரட்டவுமே பேடன்ட் காப்புரிமை பயன்படுவதாக பேடன்ட் காப்புரிமை எதிர்ப்பாளர்கள் சுட்டிக்காட்டுகின்றனர். தங்களின் கொள்ளை லாபவெறிக்காக சக மனிதர்கள் கொத்துக்கொத்தாக மரணம் அடைவதை நிறுவனங்களும், அதன் முதலீட்டாளர்களும் வேடிக்கைப் பார்ப்பதை அனுமதிக்கக்கூடாது என்றும் அவர்கள் வலியுறுத்துகின்றனர்.

நோய்களுக்கு சிகிச்சை அளிக்கும் பல மருந்துகள் பேடன்ட் காப்புரிமை பெற்றிருந்தாலும், வளரும் நாடுகளில் உள்ள பல மருந்து நிறுவனங்கள் அம்மருந்துகளை reverse engineering முறையில் தயாரித்துவிடும். இம்முறையில் பேடன்ட் காப்புரிமை பெற்ற மருந்தை தமது ஆய்வகங்களில் பகுத்தாராய்ந்து அதன் மூலப்பொருட்களை கண்டறிந்து அவற்றை வேறு முறைகளில் சேர்த்து நோய் தீர்க்கும் அம்மருந்தை ஏறக்குறைய நகலெடுத்து தயாரித்து விடுவார்கள். ஆனால் அந்த முறை நோய்த் தடுப்பு மருந்துகளில் பயன்படாது. ஏனெனில் நோய் தீர்க்கும் மருந்துகள் உயிரற்ற வேதிப்பொருட்களை பயன்படுத்தி தயாரிக்கப்படுகிறது. ஆனால் நோய்த்தடுப்பு மருந்துகள் வைரஸ் போன்ற நுண்ணுயிர்களை பயன்படுத்தி தயாரிக்கப்படுகிறது. எனவே அதன் உண்மையான கண்டுபிடிப்பாளர்களின் உதவியின்றி அந்த தடுப்பு மருந்தை மற்ற மருந்து தயாரிப்பு நிறுவனங்கள் reverse engineering முறையில் யாரும் நகலெடுக்க இயலாது.

ஆஸ்ட்ரா ஜெனிகா, நோவாக்ஸ், ஜான்ஸன் அண்ட் ஜான்ஸன், காமாலியா ஆய்வு மையம் போன்ற பல பன்னாட்டு மருந்து உற்பத்தி நிறுவனங்கள் தங்களது கண்டுபிடிப்புகளான கொரோனா நோய்த்தடுப்பு மருந்துக்கான பேடன்ட் காப்புரிமையை இந்தியாவிலுள்ள சீரம் இன்ஸ்டிடியூட் ஆஃப் இந்தியா, பயாலஜிக்கல் ஈ, டாக்டர் ரெட்டி’ஸ் லாபரேட்டரீஸ் போன்ற இந்திய நிறுவனங்களுக்கு தாமாகவே முன்வந்து voluntary lincensing முறையில் வழங்கியுள்ளன. இதன் மூலம் லாப நோக்கமற்ற நியாயமான விலையில் ஏழை நாடுகள் அந்த மருந்து தயாரிப்பு நிறுவனங்களுடன் உரிய உடன்பாடு செய்துகொண்டு அந்த தடுப்பு மருந்தை தயாரித்தோ, வாங்கியோ பயன்படுத்தி தம் மக்களை பாதுகாக்க முடியும். அது சாத்தியமில்லாத தருணங்களில் ஒரு நாட்டின் அரசு தன்னாட்டில் மருந்து வணிகம் செய்யும் நிறுவனத்துடன் compulsory licensing முறையில் உடன்பாடு செய்ய முடியும். இதன் மூலம் அந்த மருந்து தயாரிப்பு நிறுவனத்திற்கு இழப்பீடாக ஒரு குறிப்பிட்ட தொகையைக் கொடுத்துவிட்டு அந்த தடுப்பு மருந்தை தமது நாட்டில் உள்ள நிறுவனங்கள் தயாரிக்க உரிமம் பெற இயலும். 

இந்தியாவில் முதற்கட்டமாக கோவிஷீல்ட், கோவாக்ஸின் என்று இரு தடுப்பு ஊசி மருந்துகள் புழக்கத்திற்கு வந்துள்ளன. கோவிஷீல்ட் தடுப்பு மருந்தை லண்டன் ஆக்ஸ்போர்ட் பல்கலைக் கழகம் மற்றும் ஆஸ்ட்ரா ஜெனிகா தனியார் மருந்து தயாரிக்கும் நிறுவனமும் இணைந்து உருவாக்கியுள்ளன. சிம்பன்சி வகை மனிதக் குரங்கிடம் இருந்து எடுக்கப்பட்ட சாதாரண சளி தொடர்பான பாதிப்பை ஏற்படுத்தும் “அடினோ வைரஸ்” மூலம் இந்த கோவிஷீல்ட் உருவாக்கப்பட்டுள்ளது. இந்தியாவில் சீரம் இன்ஸ்டிடியூட் என்ற தனியார் வணிக நிறுவனம் இதை தயாரிப்பதற்கான உரிமம் பெற்றுள்ளது.

கோவாக்ஸின் தடுப்பு மருந்தை ஒன்றிய அரசு நிறுவனங்களான இந்திய மருத்துவ ஆராய்ச்சி கவுன்சில் மற்றும் இந்திய வைராலஜி நிறுவனம் ஆகியவற்றுடன் பாரத் பயோடெக் என்ற தனியார் நிறுவனமும் இணைந்து உருவாக்கியுள்ளன. கொரோனா தொற்றுக்கு ஆட்பட்டவர்களிடம் இருந்து பெறப்பட்ட கொரோனா வைரஸ்களை செயலிழக்கச் செய்து செயலிழந்த அந்த வைரஸ்கள் மூலம் கோவாக்ஸின் தயாரிக்கப்படுகிறது.

கோவிஷீல்ட் தடுப்பு மருந்தின் பேடன்ட் காப்புரிமை ஆஸ்ட்ரா ஜெனிகா என்ற தனியார் நிறுவனத்திடம் இருக்கிறது. அந்த நிறுவனம் இந்தியா உள்ளிட்ட சில நாடுகள் அவசர மருத்துவத் தேவைக்காக கோவிஷீல்ட் தடுப்பு மருந்தை தயாரிப்பதற்கான பேடன்ட் காப்புரிமையை voluntary licensing முறையில் வழங்குவதாக கூறியுள்ளது. பொதுவாக மருந்தை கண்டுபிடித்து, தயாரிப்பதற்கான செலவுத் தொகை மட்டும் லாபம் ஏதுமில்லாமல் voluntary licensing முறையில் வழங்கப்படுகிறது. ஆஸ்ட்ரா ஜெனிகா நிறுவனத்திற்கும், சீரம் இன்ஸ்டிடியூட் நிறுவனத்திற்கும் இடையேயான ஒப்பந்தம் என்னவென்று பொதுவெளியில் செய்தி ஏதுமில்லை. எனினும் ஆஸ்ட்ரா ஜெனிகா நிறுவனம் சார்பில் இந்தியா போன்ற நாடுகளுக்கு கோவிஷீல்ட் மருந்தை தயாரிப்பதற்கான அனுமதியை வழங்குவதாக தாமாகவே அறிவித்துள்ள நிலையில், இந்தியாவில் கோவிஷீல்ட் தடுப்பு மருந்தை தயாரிக்கும் சீரம் இன்ஸ்டிடியூட் ஆஃப் இந்தியா நிறுவனம் பேடன்ட் லாப நோக்கோடு கூடிய காப்புரிமைத் தொகையை செலுத்தவில்லை என்பது உறுதியாகிறது.

இந்தியாவின் சொந்தத் தயாரிப்பான “கோவாக்ஸின்” தடுப்பு மருந்து இந்திய அரசு நிறுவனங்களான இந்திய மருத்துவ ஆராய்ச்சி கவுன்சில் மற்றும் இந்திய வைராலஜி நிறுவனம் ஆகியவற்றுடன் பாரத் பயோடெக் என்ற தனியார் நிறுவனமும் இணைந்து உருவாக்கியுள்ளன. இந்த நிறுவனங்களுக்கு இடையேயான ஒப்பந்தங்கள் இதுவரை பொதுவெளியில் கிடைக்கப் பெறவில்லை. இந்த கோவாக்ஸின் தடுப்பு மருந்தை தயாரிப்பதற்கான முயற்சியில் இந்திய அரசு நிறுவனங்களின் பங்களிப்பு என்ன? பாரத் பயோடெக் நிறுவனத்தின் முதலீடு எவ்வளவு? கோவாக்ஸின் மருந்தின் பேடன்ட் காப்புரிமை யாரிடம் இருக்கிறது? போன்ற எந்த கேள்விக்கும் பொதுவெளியில் பதில் இல்லை. தகவல் உரிமைச் சட்ட ஆர்வலர்கள் சிலர் இந்தத் தகவலை பெறுவதற்கு மேற்கொண்ட முயற்சிகளும் தோல்வியைத் தழுவின. அரசு நிறுவனங்களும் இந்த தகவல்களை வழங்குவதற்கு மறுத்து வருகின்றன. 

கோவிஷீல்ட் தடுப்பு மருந்தை கண்டுபிடிப்பதில் ஆக்ஸ்ஃபோர்ட் பல்கலைக்கழகம் பங்களித்திருக்கிறது என்று பார்த்தோம். ஆனால் அந்த கோவிஷீல்ட் தடுப்பு மருந்திற்கான பேடன்ட் காப்புரிமை ஆஸ்ட்ரா ஜெனிகா என்ற தனியார் நிறுவனத்திடம் உள்ளது. இதற்கு இங்கிலாந்தில் பெரும் எதிர்ப்பு எழுந்துள்ளது. பொதுமக்கள் வரிப்பணத்தில் இயங்கும் ஒரு பல்கலைக் கழகத்தின் கூட்டுமுயற்சியில் உருவான கோவிஷீல்ட் தடுப்பு மருந்தின் பேடன்ட் காப்புரிமையை ஆஸ்ட்ரா ஜெனிகா என்ற தனியார் வணிக நிறுவனத்திற்கு கொடுத்ததற்கு இங்கிலாந்து மக்கள் கடும் எதிர்ப்பு தெரிவித்து வருகின்றனர். அந்த எதிர்ப்பை சமாளிக்கும் விதத்திலேயே இந்தியா உள்ளிட்ட ஏழை நாடுகளுக்கு ஆஸ்ட்ரா ஜெனிகா நிறுவனம் பேடன்ட் காப்புரிமையை voluntary lincensing முறையில் வழங்கியுள்ளதாகவும் கூறப்படுகிறது.

இந்தியாவிலும் இந்திய மருத்துவ ஆராய்ச்சிக் கழகம், இந்திய வைராலஜி நிறுவனம் ஆகியவை ஒன்றிய அரசின் மக்கள் நல்வாழ்வுத்துறையின் நேரடிக் கட்டுப்பாட்டில் இயங்கும் அரசு நிறுவனங்களாகும். இந்த அரசு நிறுவனங்கள் முழுமையாக மக்களின் வரிப்பணத்தில்தான் இயங்குகின்றன. இந்த அரசு நிறுவனங்களின் பங்களிப்போடு மேற்கொள்ளப்பட்ட ஆய்வில்தான் கோவாக்ஸின் தடுப்பு மருந்து கண்டுபிடிக்கப்பட்டது. எனவே இதன் பேடன்ட் காப்புரிமையில் இந்திய அரசுக்கும், அரசு நிறுவனங்களுக்கும் உரிய பங்கு இருக்க வேண்டும். ஆனால் இதுகுறித்த தகவல்களை ஒன்றிய அரசு மறைக்கிறது. மேலும் இந்த கோவாக்ஸின் மருந்தின் விலையை நிர்ணயம் செய்வதிலும் அரசுக்கோ, ஆய்வுகளில் பங்கேற்ற அரசுத்துறைகளுக்கோ என்ன அதிகாரம் வழங்கப்பட்டுள்ளது என்பதும் தெரியவில்லை. கோவாக்ஸின் தடுப்பு மருந்தின் விலைநிர்ணயம் குறித்த விபரங்களை பாரத் பயோடெக் நிறுவனம் மட்டுமே வெளியிடுகிறது.

பன்னாட்டு நிறுவனங்களின் கொரோனா தடுப்பு மருந்திற்கான பேடன்ட் காப்புரிமையை தற்காலிகமாக ரத்து செய்ய வேண்டும் என்று உலக வர்த்தகக் கழகத்திடம் கோரிக்கை விடுக்கும் இந்திய அரசு, இந்தியாவில் தயாரிக்கப்பட்ட கோவாக்ஸின் தடுப்பு மருந்தின் பேடன்ட் காப்புரிமை குறித்த தகவல்களைக்கூட கொடுக்க மறுப்பது இந்திய அரசின் இரட்டை நிலையை காட்டுகிறது. மேலும் இந்த தடுப்பு மருந்தை தயாரிக்க பல நிறுவனங்கள் தயாராக உள்ள நிலையில் பாரத் பயோடெக் நிறுவனத்திற்கு மட்டும் இதற்கான அனுமதியை வழங்கியுள்ளதும் பல்வேறு ஐயங்களை எழுப்பியுள்ளது. இந்த பாரத் பயோடெக் நிறுவனம் வெளிநாடுகளுக்கும் கோவாக்ஸின் தடுப்பு மருந்தை ஏற்றுமதி செய்து வருகிறது.

இந்திய மக்களின் வரி்ப்பணத்தில் இயங்கும் ஒன்றிய அரசு அமைப்புகளான இந்திய மருத்துவ ஆராய்ச்சிக் கழகம், இந்திய வைராலஜி நிறுவனம் ஆகிய நிறுவனங்களின் பங்களிப்புடன் நடைபெற்ற ஆய்வுகளின் மூலம் கண்டுபிடிக்கப்பட்ட கோவாக்ஸின் தடுப்பு மருந்தை பாரத் பயோடெக் என்ற ஒற்றைத் தனியார் நிறுவனத்தின் கட்டுப்பாட்டில் பிரதமர் மோடி தலைமையிலான பாரதிய ஜனதாக் கட்சி அரசு ஒப்படைத்தது சர்வதேச அளவில் பெரும் விவாதங்களை எழுப்பியுள்ளது.

பன்னாட்டு நிறுவனங்களின் பேடன்ட் காப்புரிமையை தற்காலிகமாக ரத்து செய்து கொரோனா தடுப்பு மருந்து அனைத்து நாடுகளுக்கும் கிடைப்பதை உறுதி செய்ய வேண்டும் என்று உலக வர்த்தக கழகத்திடம் வலியுறுத்தும் மோடி தலைமையிலான இந்திய அரசு, அதற்கு முன்மாதிரியாக இந்தியாவில் தயாரிக்கப்பட்ட கோவாக்ஸின் மருந்தின் பேடன்ட் காப்புரிமையை நாட்டுமையாக்கி இலவசமாக இந்திய மக்களுக்கு வழங்க வேண்டும் என்ற கோரிக்கை வலுக்கிறது.

இந்தியாவில் உள்ள பெரும்பகுதியினரான ஏழைகள் கொரோனா தொற்றுக்கு உள்ளாகி உயிருக்கு பரிதவித்துக் கொண்டிருக்கும் நிலையில் பேடன்ட் காப்புரிமை என்ற மரண வணிகத்தை இந்திய அரசு கைவிட வேண்டும் என்ற கோரிக்கை மிகவும் நியாயமானதே!

22 டிசம்பர், 2018

இயற்கையை அச்சுறுத்தும் எந்திரத் தேனீக்கள்!

தேனீக்கள் இவ்வுலகிலிருந்து முற்றிலுமாக அழிந்துவிட்டால், காலப்போக்கில் இந்த உலகம் எந்த உயிர்களும் வாழ்வதற்கு தகுதியற்ற இடமாக மாறிவிடும் என்று அண்மைக்காலமாக அறிவியலாளர்கள் எச்சரித்து வருகின்றனர். ஏன் இந்த எச்சரிக்கை?

இப்பூவுலகிலிருந்து பல உயிர்கள் முற்றிலுமாக அழிந்து வருகிறது. இவ்வாறு அழிந்துவரும் உயிரினங்களில் தேனீக்கள் முக்கிய இடம் வகிக்கிறது. ஒரு உயிரினம் முற்றிலுமாக அழிவது இந்த பூவுலகிற்கு புதிதான அம்சம் அல்ல. பல உயிரினங்கள் முற்றிலுமாக அழிந்து போயுள்ளன. உதாரணம்: டைனோசார். ஆனால் இவ்வாறு அழிந்த உயிர்கள் அனைத்தும் இயற்கையின் போக்கில் அமைந்தவை. இயற்கை தமக்குத் தேவையானவற்றை தக்கவைத்துக் கொள்வதையும், தேவையில்லாதவற்றை அழித்துவிடுவதாகவும் கருதலாம். இவ்வாறு இயற்கையாக ஒரு உயிரினம் அழியும்போது, அதனால் மற்ற உயிரினங்களுக்கு தீய பாதிப்புகள் ஏற்படுவதாக பதிவுகள் ஏதும் இல்லை. 

ஆனால் தற்போது பல உயிரினங்கள் இந்த பூவுலகிலிருந்து அழிந்து போவதற்கு காரணம் மனிதன் என்பது கவனிக்கப்படவேண்டிய முக்கிய அம்சமாகும். காடுகளை அழித்தொழிப்பதும், நீர்நிலைகளை ஆக்கிரமிப்பதும், இயற்கையின் அத்தியாவசியத் தேவையான புல்வெளிகளை வேறு பயன்பாட்டுக்கு மாற்றி அமைப்பதும் பல்வேறு உயிரினங்களை படிப்படியாக அழித்து முற்றிலுமாக அகற்றிவிடுவதை உயிரியலாளர்கள் சுட்டிக்காட்டி வருகின்றனர். இவற்றில் தேனீக்கள் அழிக்கப்படுவதற்கு மேற்சொன்ன காரணங்களோடு நமது வேளாண்மை முறைகளும் முக்கிய காரணங்களாக அமைகின்றன. குறிப்பாக பூச்சிக்கொல்லி நச்சுக்கள் மற்றும் மரபணு மாற்றப்பட்ட பயிர்வகைகள் ஆகியவை பல்வேறு பூச்சிகளையும், மிகக்குறிப்பாக தேனீக்களையும் அழித்து வருகின்றன.

இந்தத் தேனீக்கள் நமது சூழலில் மிக முக்கிய பணிகளை செய்து வருகின்றன. அப்பணிகளிகள் மிக முக்கியமானது தாவரங்களின் மகரந்தச் சேர்க்கைக்கான கருவியாக செயல்படுவது. மலர்களில் இருக்கும் தேனை அருந்துவதற்காக செல்லும் தேனீக்கள், அம்மலர்களில் உள்ள மகரந்தத் துகள்களை தம் உடலில் சுமந்துசென்று வேறு மலர்களில் அமர்வதன் மூலம் மகரந்தச் சேர்க்கை என்ற அபாரமான இயற்கைச் செயல்பாட்டின் முக்கிய காரணியாக விளங்குகிறது. ஒரே தாவரத்தின் மலர்களின் இடையேயான மகரந்தச் சேர்க்கை, தன் மகரந்த சேர்க்கை என்றும்; இருவேறு தாவரங்களின் மலர்களுக்கு இடையேயான மகரந்தச் சேர்க்கை, அயல் மகரந்தச் சேர்க்கை என்றும் அழைக்கப்படுகிறது. இவ்விரண்டு வகை மகரந்தச் சேர்க்கைகளில் அயல் மகரந்தச் சேர்க்கை நடைபெற தேனீ உள்ளிட்ட பூச்சி வகைகளே முக்கிய பங்கு வகிக்கின்றன. 

இத்தகைய மிகமுக்கியமான பணியைச் செய்யும் தேனீக்கள் இனம் அழிந்துவிட்டால் தாவரங்களின் மகரந்தச்சேர்க்கை என்ற செயல்பாடு தடைபடும். இந்தப்பணி தடைபட்டால் தாவரங்கள் இனப்பெருக்கம் செய்வது முற்றிலுமாக பாதிக்கப்படும். இதனால் தாவரங்கள் படிப்படியாக குறைந்து இறுதியில் முற்றிலும் இல்லாமலே போய்விடலாம். இதைத் தொடர்ந்து தாவரங்களை நம்பி வாழும் விலங்குகளும், மனிதர்களும் பாதிக்கப்படும் நிலை ஏற்படும். தாவர உண்ணிகளின் எண்ணிக்கை குறைந்தால் அந்த தாவர உண்ணிகளை உண்டுவாழும் மாமிச உண்ணிகளுக்கும் காலப்போக்கில் உணவுப் பற்றாக்குறை ஏற்படும். குறிப்பிட்ட காலத்தில் இந்த உலகில் உயிரினங்களே இல்லாத நிலை ஏற்படலாம் என்று உயிரியலாளர்கள் எச்சரிக்கை விடுக்கின்றனர். 

ஆனால் உயிரியலாளர்களின் இந்த எச்சரிக்கை எல்லாம் பணத்தை மட்டுமே செல்வமாகக் கருதும் வணிக உலகின் காதுகளில் விழுமா என்ன? வர்த்தக உலகத்தைப் பொறுத்தவரை முதலீடும், அதை திரட்ட துணை புரியும் பங்குச் சந்தையும்தானே முக்கியம். எனவே இயற்கை குறித்த அவர்களின் பார்வை வேறுமாதிரிதானே இருக்கும். 

இந்த அற்பத் தேனீப்பூச்சிகளுக்காக நாம் காடுகளை அழிக்காமல் இருக்க முடியுமா? நீர்நிலைகளை ஆக்கிரமிக்காமல் இருக்க முடியுமா? புல்வெளிகளை வேறு பயன்பாட்டுக்கு மாற்றாமல் இருக்க முடியுமா? அல்லது நச்சுத்தன்மை வாய்ந்த பூச்சிக்கொல்லிகளை பயன்படுத்தாமலோ, மரபணு மாற்றப்பட்ட நச்சுத் தாவரங்களை சாகுபடி செய்யாமலோ வேளாண்மை செய்ய முடியுமா? இதனால் ஏற்படும் பொருளாதார வீழ்ச்சியை யார் தடுப்பது? இதனால் பங்குச் சந்தை முதலீட்டாளர்களுக்கு ஏற்படும் இழப்புகளை யார் ஈடு செய்வது? 

இவ்வாறான பாதிப்புகள் இல்லாமலேயே தேனீக்களின் இழப்பை ஈடு செய்ய அற்புதமான ஒரு தீர்வை வர்த்தகம் சார்ந்த அறிவியல் உலகம் கண்டுபிடித்துள்ளது. அது என்னவென்றால் இயந்திரத் தேனீயை உருவாக்குவதுதான்! 


சின்னக்குழந்தைகளின் விளையாட்டுக்காக உருவாக்கிய ரிமோட் கண்ட்ரோலில் இயங்கும் விமானங்கள்தான் இவற்றின் முன்னோடிகள். இவற்றில் காமெராக்களை பொருத்தி பல்வேறு பயன்பாடுகள் செயல்படுத்தப்பட்டன. இந்தியா போன்ற நாடுகளில் மக்களை உளவு பார்க்க அரசாங்கம் இத்தகைய கருவிகளை பயன்படுத்துகிறது. இதன் அடுத்தக் கட்டமாக இயந்திரக் கொசுக்கள் உருவாக்கப்பட்டன. தற்போது இயந்திரத் தேனீக்கள் உருவாக்கப்பட்டுள்ளன.

இயந்திரத் தேனீக்களை முதலில் உருவாக்கியவர் ஜப்பான் நாட்டின் நேஷனல் இன்ஸ்டிடியூட் ஆஃப் அட்வான்ஸ்ட் இன்டஸ்ட்ரியல் சயின்ஸ் அண்ட் டெக்னாலஜியைச் சேர்ந்த எய்ஜிரோ மியாகோ என்பவர். சுமார் 4 சென்டி மீட்டர் அகலமும், 15 கிராம் எடையும் கொண்ட இந்த எந்திரங்களின் அடிப்பகுதியில் ஒருவகைப் பசைப் பொருளைத் தடவிய குதிரை மயிர் இணைக்கப்பட்டிருக்கும். தாவரங்களின் மேல்பகுதியில் இந்த எந்திரத் தேனீ பறக்கும்போது, அவற்றின் கீழ்ப்பகுதியில் இருக்கும் குதிரை மயிரில் மகரந்தத் தூள்கள் ஒட்டிக்கொள்ளும். பிறகு வேறு ஒரு தாவரத்தின் மேல் அந்த எந்திரத் தேனீ பறக்கும்போது ஏற்கனவே அதில் ஒட்டி இருக்கும் மகரந்தத்தூள்கள் உதிர்ந்து அயல் மகரந்தச் சேர்க்கைக்கு காரணமாகும். 

இது போன்ற ஆய்வுகள் உலகின் எந்த மூலையில் தொடங்கப்பட்டாலும், உடனடியாக பலரும் அதேபோன்ற ஆய்வுகளில் ஈடுபடுவது வழக்கம். அமெரிக்காவின் ஹார்வர்ட் பல்கலைக்கழகமும் எந்திரத் தேனீக்களுக்கான ஆய்வில் ஈடுபட்டது. இதுபோன்ற ஆய்வுகள் இன்னும் பலவும் நடக்கலாம். இந்த இயந்திரத் தேனீக்கள் உயிருள்ள தேனீக்களுக்கு பதிலாக விளைநிலங்களில் உள்ள தாவரங்களில் ஊடுருவி மகரந்தச் சேர்க்கை செய்ய பயன்படும் என்பது இதைக் கண்டுபிடித்தவர்கள் கூறுகின்றனர். 

இதற்கிடையில் இந்த இயந்திரத் தேனீக்களுக்கான உற்பத்தி சார்ந்த காப்புரிமையை (Patent) பன்னாட்டு வர்த்தக நிறுவனமான வால்மார்ட் கோரி விண்ணப்பம் செய்துள்ளது. 

 இதற்கான சட்டரீதியான நடவடிக்கைகள் அமெரிக்காவில் தொடங்கப்பட்டுள்ளன. அடிப்படையில் நேரடி சில்லறை விற்பனை நிறுவனமான வால்மார்ட், பல பொருட்களின் உற்பத்தியை நேரடியாகவும், மறைமுகமாகவும் தமது கட்டுப்பாட்டில் வைத்துள்ளது. பல பெரிய நிறுவனங்களை முழுமையாக தன்னகப்படுத்திக் கொண்டிருக்கிறது. அவற்றில் வேளாண்மை சார்ந்த பல துறைகளும், நிறுவனங்களும் அடக்கம். இந்நிலையில் இயந்திரத் தேனீக்களுக்கான உற்பத்தி சார்ந்த காப்புரிமையை வால்மார்ட் நிறுவனம் பலநாடுகளில் வசிக்கும் வேளாண்மை மற்றும் இயற்கை ஆர்வலர்களிடம் பெரும் கவலையை உருவாக்கியுள்ளது. எந்திரத் தேனீக்களுக்கான உற்பத்தி சார்ந்த காப்புரிமை வால்மார்ட் நிறுவனத்திற்கு வழங்கப்பட்டால், அந்தத்துறையில் ஈடுபட்டுவரும் மற்ற நிறுவனங்கள் மிகப்பெரும் அளவில் பாதிக்கப்படும். ஏனெனில் வால்மார்ட் நிறுவனம் காப்புரிமை பெற்ற எந்திரத்தேனீயில் மற்ற நிறுவனங்கள் ஆய்வு செய்வது வால்மார்ட் நிறுவனத்தின் காப்புரிமையை மீறும் செயல்பாடாக கருதப்படும். எனவே எந்திரத்தேனீ என்ற கருத்தாக்க(concept)த்தில் வால்மார்ட் நிறுவனம் வைத்ததே சட்டம் என்ற நிலை ஏற்பட்டு விடும். 

பரந்துவிரிந்திருக்கும் விளைநிலங்களில் மகரந்தச் சேர்க்கை நடைபெற எத்தனை இயந்திரத்தேனீக்கள் தேவைப்படும்? அதை சாதாரண விவசாயிகள் எவ்வாறு பயன்படுத்துவார்கள்? அந்த எந்திரத் தேனீக்களை காப்புரிமை செய்யும் நிறுவனம் அதற்கான விலையை அல்லது வாடகையை எவ்வாறு நிர்ணயம் செய்யும்? என்பது போன்ற எண்ணற்ற கேள்விகள் எழுகின்றன. 

இயற்கையான தேனீக்களில் பலவகைகள் உள்ளன. அனைத்துத் தேனீக்களும் ஒரே மாதிரி இருப்பதில்லை. அவற்றில் பல்வேறு வகைகள் உள்ளன. ஒவ்வொரு வகை தேனீயும் தமக்கென்று சிறப்பான இயல்புகளைக் கொண்டவை. ஒவ்வொருவகை தேனீயும் ஒரு குறிப்பிட்ட சிலவகைத் தாவரங்களில் மட்டுமே தேன் அருந்தும் இயல்பு கொண்டவை. இதற்கு குறிப்பிட்ட தாவரங்களின் தோற்றம், வண்ணம், மணம் உள்ளிட்ட பல்வேறு தன்மைகள் தீர்மானிக்கும் சக்திகளாக இருக்கின்றன. இவற்றை காடுகளிலும், மலைகளிலும் வசிக்கும் தேன் சேகரிக்கும் பழங்குடி மக்கள் நன்கு உணர்வார்கள். இயற்கையாக அமைந்த தேனீக்களின் இந்த இயல்புகளை, இயந்திரத் தேனீக்கள் எந்த அளவுக்கு ஈடு செய்யும் என்று அறிவியலாளர்கள் கேள்வி எழுப்புகின்றனர். 

இந்தக் கேள்விகளைவிடவும் கவனிக்க வேண்டிய முக்கியமான வேறு சில அம்சங்களும் இந்த விவகாரத்தில் உள்ளன. இயற்கையான தேனீக்கள் மூலம் அயல்மகரந்தச் சேர்க்கை ஒருவிதமான இயற்கை ஒழுங்குக்கு உட்பட்டை நடப்பதாக அறிவியலாளர்கள் கருதுகின்றனர். இந்த இயற்கை ஒழுங்கை எந்திரத் தேனீக்கள் கடைபிடிக்குமா என்பது மிகப்பெரிய கேள்விக்குறி. 

எந்திரத் தேனீக்கள் மேலும் சில விதைகள் சார்ந்த காப்புரிமை சட்டப் பிரச்சினைகளை கொண்டுவரும் வாய்ப்பும் இருக்கிறது. 

வேளாண்மை தொடர்பான காப்புரிமை பிரச்சினைகளில் முக்கியமான விவாதங்களை உருவாக்கிய முக்கியமான நபர் கனடா நாட்டைச் சேர்ந்த பெர்ஸி ஷ்மெய்ஸர் என்ற விவசாயி. இவர் இயற்கை விவசாயம் செய்து வந்த வயல்வெளிகளில், மான் சான்டோ நிறுவனம் காப்புரிமை செய்திருந்த பயிர்களின் மரபணுத்துகள்கள் இருப்பதாக குற்றச்சாட்டு எழுந்தது. தாம் காப்புரிமை செய்திருந்த மரபணுத்துகள்களை உரிய கட்டணம் செலுத்தாமல் பெர்ஸி ஷ்மெய்ஸர் பதுக்கி வைத்திருப்பதாகவும், அதற்கு இழப்பீடு வழங்க வேண்டும் என்றும் மான் சான்டோ நிறுவனம் சட்ட நடவடிக்கையையும் துவக்கியது. அதைத் தொடர்ந்த நடைபெற்ற விசாரணையில் பெர்ஸி ஷ்மெய்ஸர் நிலத்திற்கு அருகே உள்ள நிலத்தின் விவசாயி மான் சான்டோ நிறுவன விதைகளை விதைத்திருந்ததும், அந்த நிலத்திலிருந்து காற்று மற்றும் பூச்சிகள் மூலம் நடைபெற்ற அயல் மகரந்தச் சேர்க்கை காரணமாக பெர்ஸி ஷ்மெய்ஸர் நிலத்தில் மான் சான்டோ நிறுவனம் காப்புரிமை செய்திருந்த மரபணு மூலக்கூறுகள் பரவி இருந்ததும் கண்டுபிடிக்கப்பட்டது. எனினும் நவீன காப்புரிமை சட்டங்களின்படி இது தண்டனைக்குரிய குற்றமாகவே கருதப்படும். 
சட்டங்கள் இவ்வாறு இருக்கும் நிலையில் எந்திரத் தேனீக்களின் மூலம் காப்புரிமை செய்யப்பட்ட மரபணு மூலக்கூறுகளை எவரொருவரின் விவசாய நிலத்திலும் திட்டமிட்டு பரவச் செய்யமுடியும். அதன் மூலம் அந்த நிலத்தில் அத்துமீறி செயல்படுவதோடு, அந்த நிலச் சொந்தக்காரரை சட்டத்தின் மூலம் குற்றவாளியாகவும் நிறுத்த முடியும். மேலும் இந்த எந்திரத் தேனீக்கள் மூலம் இயற்கை விவசாயம் என்ற ஒன்றை முழுவதும் இல்லாமல் செய்யவும் முடியும். ஒட்டுமொத்தத்தில் உலகின் விவசாயம் அனைத்தையும் ஒருசில பன்னாட்டு நிறுவனங்களின் முழுக்கட்டுப்பாட்டில் அடைத்து வைக்கவும் முடியும். 

இத்தகைய அபாயங்கள் இருக்கும் நிலையில் எந்திரத்தேனீக்கள் கொண்டுவரும் அபாயங்களை எதிர்கொள்ள உலக அளவில் இயங்கும் இயற்கை வேளாண்மை ஆர்வலர்கள் ஆலோசனைகளை மேற்கொண்டுள்ளனர். 

இயற்கையையும், அதன் படைப்புகளையும் புரிந்துகொண்டு அவற்றின் சமநிலையை குலைக்காமல் வாழப்பழகுதலே உண்மையான அறிவியலாக இருக்க முடியும். இயற்கையின் படைப்புகளை நமது பேராசை கொண்ட செயல்பாடுகள் மூலம் அழித்துவிட்டு, செயற்கையான இயந்திரங்கள் மூலம் இயற்கைப் படைப்புகளின் இழப்புகளை ஈடுசெய்ய முடியும் என்று நம்புவது மூடநம்பிக்கையாகவே அமையும்.  

(பூவுலகு இதழில் வெளிவந்த கட்டுரை)